Sula dtionscnóidh tú caingean forfheidhmiúcháin dlí

Chun socrú a dhéanamh nó chun dul chun dlí

Is féidir le dlíthíocht maoine intleachtúla, amhail gach cineál dlíthíochta, bheith am-íditeach agus thar a bheith costasach. Dá réir sin is fiú breathnú ar réitigh eile sula gcinnfidh tú cén cineál caingne dlíthiúla is fearr. Is fearr na réitigh sin a scrúdú le cuidiú ó chomhairleoir dlíthiúil/gairmí maoine intleachtúla ionas go gcuirfear cosc ar an sárú nó ar go ndéanfaí an cheist a shocrú lasmuigh den chúirt.

Réiteach amháin is ea smaoineamh ar litir éilimh, nó litir scoir agus éirigh as a eisiúint. Baintear úsáid as é sin go minic chun teacht chuig an té atá in ainm a bheith ag sárú na gceart um maoin intleachtúil.

Ba cheart sásraí idirbheartaíochta, idirghabhála, eadrána agus réitigh mhalartach díospóidí a chur san áireamh chomh maith sula gcuirfear tús le dlíthíocht os comhair na cúirte. I gcás nach n-éireoidh leis na hiarrachtaí ar fad réiteach lasmuigh den chúirt a fháil, áfach, d’fhéadfaí a mholadh duit gurb é an rud is fearr le déanamh caingean a thabhairt os comhair na cúirte. Mura bhfuil sé déanta agat cheana, ba chóir duit teagmháil a dhéanamh le haturnae/comhairleoir dlíthiúil/gairmí maoine intleachtúla, a bheidh ábalta comhairle a thabhairt duit faoin dóigh le dul ar aghaidh agus measúnú ar an seans go n-éireoidh leat a thabhairt duit. Roimh dhlíthíocht, ba cheart na tosca seo a leanas a chur san áireamh agus a mheas:

Neart do cháis agus an deis a bheidh ann agra a dhéanamh
An baol go dteipfear ort/seans go n-éireoidh leat.
Infhaighteacht cosanta don chontrapháirtí/don duine a rinne an sárú (e.g. frithéilimh nó eisceachtaí).
Go bhfuil cruthúnas agat ar úinéireacht na gceart um maoin intleachtúil lena mbaineann.
Go dtaispeánann tú go ndearna sárú.
Méid an fhaoisimh i bhfoirm an chúitimh agus na damáistí a d’fhéadfaí a aisghabháil.
Costais na dlíthíochta.
Malairtí féideartha ar bith eile.

Próiseas an Iarratais ar Chaingean leis na hÚdaráis Custaim/Coimisinéirí Ioncaim

Cur chuige eile ná beart coisctheach forfheidhmiúcháin a úsáid a bhaineann leis na húdaráis custaim. Is féidir le húinéir maoine intleachtúla iarratas a dhéanamh ar fhógra um chaingean leis na húdaráis custaim chun lastais earraí a sháraíonn maoin intleachtúil a stopadh go díreach ag pointí allmhairiúcháin isteach sa Stát. Tá Sonraí ar fáil i Roinn 2 den Lámhleabhar um Fhorfheidhmiú Custaim maidir le Cearta Maoine Intleachtúla a d’eisigh na Coimisinéirí Ioncaim.

Forfheidhmiú Custaim.pdf (méid 224 KB)

Príomhphointí le cur san áireamh:

Déan scrúdú ar gach maoin intleachtúil ar le d’eagraíocht/cuideachta í agus atá riachtanach do d’eagraíocht/chuideachta.
Cláraigh do chearta um maoin intleachtúil sna tíortha ina ndéanann tú gnó.
Deimhnigh nach bhfuil d’aireagán, trádmharc, branda, ábhair mhargaíochta, suíomh gréasáin do chuideachta, nó íomhánna do do phacáiste, táirge nó seirbhís ag sárú ceart daoine eile.
Ná bain úsáid ach as ábhar atá ceadúnaithe mar is ceart.
Cosain faisnéis rúnda gnó go hinmheánach agus go seachtrach.
Bí aireach trí mhonatóireacht a dhéanamh ar an tírdhreach ábhartha maoine intleachtúla.
Bain úsáid as gníomh custaim chun stop a chur le lastais earraí a sháraíonn maoin intleachtúil.
Cuir straitéis chosanta i bhfeidhm chun sáruithe a chomhrac.
Más gá duit do chearta a fhorfheidhmiú, bí ábalta do chás a dhéanamh sula rachaidh tú os comhair na cúirte leis.
Cinntigh go bhfuil an modh forfheidhmiúcháin a roghnaigh tú i gcoinne an duine/cuideachta cheart.
Faigh cuidiú ó ghairmí maoine intleachtúla.